Отбасы — алтын діңгек

Бұл тәрбие сағаты отбасылық құндылықтарды дәріптеуге, бала бойына сүйіспеншілік пен жылылық ұялатуға бағытталған. Әке мен ананы құрметтеп, адал да парасатты ұл мен қыз болып қалыптасуға, сондай-ақ қоғамға жат қылықтардан сақтануға үндейді.

Мақсаты

  • Сүйіспеншілік пен жылылық сезімін қалыптастыру.
  • Ата-ананы құрметтеуге, адалдық пен парасаттылыққа тәрбиелеу.
  • Жақсы тәрбиені нәтижелі етуге үйрету, жат қылықтардан сақтандыру.

Көрнекілігі

  • Ата-ана туралы ұлағатты сөздер.
  • Шарлар, слайдтар, фотосуреттер.

Әдісі

  • Ой бөлісу.
  • Топтық жұмыс.
  • Пікір алмасу.

Тәрбие сағатының барысы

1) Ұйымдастыру кезеңі

  • Қонақтармен сәлемдесу.
  • Оқушылардың орналасуын қадағалау.

2) Кіріспе сөз және түсініктеме

Мұғалімнің кіріспесі отбасы ұғымының қадірін арттырып, ата-ананың орнының айрықша екенін еске салады. Қазақта: «Ана — сая болар бағың болса, Әке — асқар тауың» дейді.

Бір күн бар жылатар күн, жұбатар күн,
Бір күн бар мұңайтар күн, қуантар күн.
Мейлі ол шаңырақ сәтті болсын, сәтсіз болсын,
«Әке» деген сезімді ұмытар кім?!

Ана — жарық сыйлаған жан екенсің,
Ана — шуақ шашатын таң екенсің.
«Ана — өмір, ана — бақыт, ана — жүрек»,
Деп соққан жүрегімнің әні екенсің.

Бүгін Отбасы мерекесіне арналған акция аясында «Отбасы — алтын діңгек» атты шағын шарамызға қош келдіңіздер! Ендеше, ұлылардан қалған ұлағатты сөздерге құлақ түрейік.

3) «Ұлылардан қалған ұлы сөздер»

  • Мұхаммед Пайғамбар: «Әуелі анаңды сыйла, сосын анаңды сыйла және тағы да анаңды сыйла!»
  • Кемал Кеніш: «Үйіміздің шуақты нұры — аяулы ана болса, асқар тауы, ақылшы тірегі — әке.»
  • Дулат Бабатайұлы: «Ата-ана ақылы — қазылған қара кенмен тең.»
  • Махмұд Қашқари: «Атасынан ақыл алса — тентек ұл да жөнделер.»
  • Виктор Гюго: «Нәзіктік атаулының жиынтығы — ананың алақаны, сондықтан ол сәби үшін жылы ұя.»
  • Қадыр Мырза Әли: «Қазақ әйелі — бар мұратын отбасының игілігіне арнаған әлемдегі ең ізгі жан иесі.»
  • Ғабит Мүсірепов: «Ана — бар тілегін перзентінің жолына, бақытына арнаған әлемдегі ең мейірбан жан.»
  • Ғабиден Мұстафин: «Балаға сіңірген ата-ананың еңбегін бала өмір бойы ақтап бола алмайды. Ол — өле-өлгенше суынбайтын, сарқылмайтын махаббат.»

Хор

«Ана туралы жыр» (сынып оқушылары орындайды).

4) Оқушылар пікірі: әдеп пен құрмет туралы

Ұл-қыз ата-анасын және үлкендерді қуанышқа бөлеп, бақытқа кенелтем десе, ең алдымен әдепті болуы керек. Ісін адал әрі тыңғылықты атқарған бала ата-ананың үмітін ақтайды.

Ата-ананы сыйлау — бала кезде өзіңді қалай бағып-қағса, қартайғанда оларды да солай аялап, құрметтеу.

Ата-ананың көңілін қалдырма, жүрегіне қайғы түсірме.

Ата-анасын ұмытқан бала — опасыздықтың ең ауырына барады; мейірімсіздікке жол береді.

Ата-ананың қадірін білмеген адам халықтың да қадірін терең түсінбейді.

Түн ұйқысын төрт бөлген, бесік тербеткен ананың ақ мейірімін бағаламау — үлкен қателік.

Кейбір балалар ата-анасына қарсы сөйлеп, айтқанын тыңдамай жатады. Мұндай қылықтан аулақ болайық. Әке — тірегің, қамқоршың, асқар тауың. Ана — жарық дүниеге әкелген жан.

Қорытынды сөз

1-жүргізуші

Келе ғой, ботақаным, өзіме деп,
Анам кеп сипағанда шашымды жай.
Күйімді кешсеңдер-ау сол кездегі,
Әкемнің маңдайымнан өпкен кезі-ай.

2-жүргізуші

Тұрғандай ана сөзі тербеп мені,
Өмірім өнеріммен өрнектелді.
Тілейді әр ізіме ақ жол менің,
Әрқашан әке үні жебеп мені.

Құрметті ата-аналар, оқушылар! Сыныбымыздың атынан әр шаңыраққа амандық пен береке тілейміз. Қыздарыңыз қызғалдақтай құлпырып, ұлдарыңыз ізгі армандарыңызды жүзеге асыра берсін.

Бүгінгі тәрбие сағаты осымен аяқталды. Келген қадамдарыңызға гүл бітсін! Келесі кездескенше сау болыңыздар!